گؤزل سؤز

بیلمه سم ده کیمین دیر
بو سؤز گؤزل، متین دیر
عاشیق اولماق لاپ آسان
عاشیق قالماق چتین دیر

یاخشیلیق

سئوگی، انسان، یاخشیلیق

دوزلوک، ایمان، یاخشیلیق

چوخداندیر بوردا اؤلوب

شرف، ویجدان، یاخشیلیق

آج

بیر توخ آدام، آجی گؤرسون
درد چکمز، غم-غصّه یئمز
آج آدامی درک ائله مز
اوتانماز، اؤلمَز، اریمز

اوروج توتوب، ناماز قیلار
بوینو ائششک بوینو کیمین
میللتی لاپ دین سیز بیلر
اؤزونو، مؤمن،  اهل دین

مسجدلره هئچ کیم گئدمیر
بوشالیب دای هئچ واخت دولماز
قدیم کیلر دؤز دئیب لر
آج قاریندا ایمان اولماز

بو دونیادان

به غیر حسرت آپارماز بشر بودونیادان
قوتور کئچی کئچر و شیر نر بو دونیادان

غرورو ترک ائله، دایم مَنم مّنم ائله مَه
سّنی ده توپراق ائدَر، الحذر بو دونیادان

دّرین دَنیزدیر آدام اوغلونو بَتَر بوغاجاق
نجات تاپمایاجاق بیر نفر بو دونیادان

وئریر میللته دائم خبر او دونیادان
اگرچه شیخ ده یوخدور خبر بو دونیادان

فلاسفه بویوروبلار، منیم سؤزوم ده بودور
بیرآز لذّت آپار مختصر بو دونیادان

اگرچه درس اوخویوب، لاپ سفیه دی نوع بشر
قودوق گلیبدیر و ائششک گئدر بو دونیادان

ایشیق

قارما-قاریشیق اولما
هر کیمَه عاشیق اولما
آنلاماز،کؤر آداما
گؤنش،آی،ایشیق اولما
qarmaqarışıq olma
Hər kimə aşıq olma
Anlamaz, kor adama
Günəş, ay, işıq olma